مركبك في بحر الحياة شراعها المعرفة !

بيت الرصيف مساحة إتعملت علشان نساعد بعض إننا نحقق أحسن نتيجة من وجودنا عالأرض، وعلشان نوصل لأحسن النتايج قررنا إننا نستعمل كُل وسائل التواصُل اللي حوالينا بالخير علشان نوصل للحق.

القرآءة نوع من أنواع التواصل بين الناس، بتخلينا نسمع بعض كويس ونتبادل خبراتنا مع بعض. إحنا كبني آدمين فينا الخير والشر والكُتب -ماعدا اللي جاي من عند ربنا- اللي عاملها بني آدمين، فلما تدخُل أي مكتبة أو أي معرض للكتاب دوّر على اللي هايحقق الخير اللي جواك.

بالتعاون مع عدد من المكتبات المُتخصصة في بيع الكُتب المُستعملة.

إن شاء الله إحنا هنعمل معرض للكتب المُستعملة في بيت الرصيف هيفتح من يوم الجُمعة 3 ابريل لحد يوم السبت 11 أبريل.

المعرض هيبتدي بـ 20000 كتاب،
مجالات الكُتب اللي هتكون موجوده في المعرض هتتحدد بُناءً على إختياراتكم بالإجابة عن السؤال الموجود تحت في الإيفنت.

أسعار مُعظم الكتب المُستعملة في معرض الرصيف بين جنيه واحد لحد 20 جنيه.

إن شاء الله المعرض السنة دي هيبقى معاه معرض للمُنتجات اليدوية، تابعونا علشان تعرفوا هيكون موجود إيه في المعرض ده

==========================================
بيت الرصيف فيلا رقم 8 في شارع 152 متفرع من ميدان الحرية في المعادي قدام بنك أبو ظبي.


وصف تفصيلي علشان تعرف تيجي بيت الرصيف


لو هتركب مترو : هتخرج من محطة مترو المعادي من إتجاه المرج على شارع 7 هتمشي يمين وتدخل لحد ما هتلاقي محل الشبراوي تدخل من جنبه شمال أول ناصيه تقابلك هتلاقي بنك أبو ظبي على يمينك وبيت الرصيف قدامه.

لو جاي بعربية أو تاكسي هتاخد طريق كورنيش المعادي : هتدخل مدخل المعادي رقم 1 من عند أكاديمية السادات في أول يمين في أول شمال هتطلع على ميدان الحرية ب هتكمل علطول في نفس الشارع وهتدخل تاني شمال بعد الميدان لحد آخر الشارع هتلاقي بيت الرصيف على شمالك فيلا قدام بنك أبو ظبي.

لو هتركب ميكروباص هتنزل موقف العرب أو صقر قريش على حسب إنت جاي منين وهتركب ميكروباص بيقول مترو وتقول للسواق ينزلك ميدان الحرية هتدخل شارع 151 من عند صيدلية العزبي لحد ما هتلاقي بنك أبو ظبي على شمالك بيت الرصيف هو الفيلا اللي قدامه.